RSS

நாகூர் ரூமியின் கவிதைகள்

05 Dec

இறைவனின் வீடு
=============

அன்றொரு நாள் அகஸ்மாத்தாகப்
போக நேரிட்டது
இறைவனின் வீட்டுக்கு.

சப்தங்கள் ஏதுமின்றி
சுத்தமாக இருந்தது வீடு.

அரண்மணை தரமுடியாத அழகும்
குடிசையில் இல்லாத குணமும்
இருந்தது அந்த வீட்டுக்கு.

அறைகளுமில்லை திரைகளுமில்லை
கதவுகளுமில்லை சுவர்களுமில்லை
அற்புதமான அந்த வீட்டில்.

மூடிய எதையுமே
தேடியும் கிடைக்கவில்லை அங்கு.

எப்போதென்று தெரியவில்லை
எனினும்
ஏற்கனவே இந்த வீட்டுக்கு
வந்திருக்கிறேன்
என்றுதான் தோன்றியது.

வந்தவீடுதான் என்றாலும்
சொந்தவீடுபோல் இருந்தது
புகுந்த வீடுதான் என்றாலும்
பிறந்த வீடுபோல் இருந்தது.

யார் வீட்டுக்கோ
வந்ததுபோல் இருந்தது
என் வீட்டுக்குத் திரும்பியபோது.

வெகுதொலைவில் இருப்பதாக நினைத்து
வாணாளை வீணடித்தது நான்தான்.
அன்றுதான் தெரிந்து கொண்டேன்
என் வீட்டுக்கு அருகில்தான்
இறைவனின் இல்லம் இருந்ததென்று.

அண்மையை தொலைவாகவும்
தொலைவை அண்மையாகவும்
எண்ணி எண்ணி நான்
இழந்தது எவ்வளவோ.

இனிமேலும் இழக்க மாட்டேன்
என் இறைவனின் வீட்டை.
ஏனெனில் நான்
எங்கே போனாலும்
என்னோடே வருகிறது
வினோதமான அவன் வீடு.

— நாகூர் ரூமி
ruminag…@gmail.com

சாகும் கலை
==============

செத்துத் தொலை என்று

சபித்திருக்கிறேன்

சில நேரங்களில்.

சாபங்களைச் சகித்துக் கொண்டு

சப்தம் போடாமல் சமயலைறைக்குள்

சென்றவளை எண்ணி

செத்திருக்கிறேன்

பல நேரங்களில்.

சாவு வீட்டில்

சிந்திக் கொண்டே

சொத்துச் சண்டை போட்டுக்கொண்ட

செத்துப்போன சொந்தங்களை எண்ணி

செத்திருக்கிறேன்.

வயிற்றிலொரு குட்டியொடு

வாயில்லா ஜீவனொன்று

வாசல் தாண்டி உள்ளே போய்

வளர்த்த செடியில்

வாய் வைத்ததென

கட்டி வைத்துக் கதறக் கதற

கட்டையொன்றால் கோபம் தன்னை

கட்டவிழ்த்த கொலைகாரனை எண்ணி

செத்திருக்கிறேன்.

அல்லாஹு அக்பர் என்று சொல்லி

அப்பாவிகள் கழுத்தையறுக்கும்

அராஜகத்தை எண்ணி எண்ணி

செத்திருக்கிறேன்.

வாழ்வும் சாவும்

வீரனுக்கு ஒருமுறைதானாம்.

என்ன விதமான கோழை நான்

இத்தனை முறை சாவதற்கு?

– நாகூர் ரூமி

அம்ருதா, நவம்பர் 2006

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: