RSS

மானுட மகத்துவம்

23 Aug

Zafarullah

சடையப்ப வள்ளலின் கொடைத்தன்மையை வருணிக்கையில்

“அடையா நெடுங்கதவும் அஞ்சலென்ற சொல்லும்
உடையான் சடையன்” என்று கூறுவான் கவிக்கொம்பன் கம்பன்

சடையப்ப வள்ளலின் நெடுங்கதவு திறந்தே இருக்குமாம். (செல்வத்தின் உச்சியில் மிதந்த அவனது வீட்டுக் கதவு வேலைப்பாடு மிக்கதாகவும், நீண்டு நிமிர்ந்த நெடிய வாசல் நிலையை அலங்கரிக்கக் கூடியதாகவும் இருந்ததை ஒரே வார்த்தையில் – ‘நெடுங்கதவு’ என்ற வார்த்தை மூலம் நம் கண்முன்னே வந்து காட்சியாய் நிறுத்தி விடுகிறான் கம்பன்)

பசித்தவர் வந்து புசித்திட ஏதுவாக எந்நேரமும் அந்தக் கதவுகள் திறந்தே இருக்குமாம். மானுடப் பண்பின் மகத்தானதொரு பண்பு ஈகை. உதவி கேட்டு வருபவர்களுக்க்கு “மூடு” இருக்கும் போது மட்டும் வாரி வழங்கிவிட்டு மற்ற நேரங்களில் முகத்தைச் சுளித்து விரட்டியடிப்பது மானுடப் பண்பன்று. “இல்லை” என்ற சொல்லை உதிர்க்காத ஈகைகுணம் வாய்ந்தவனாக வாழ்ந்திருக்கிறான் சடையப்ப வள்ளல்.

“நித்தமும் கதவினை திறப்பது மானுடம்” என்ற கவிஞர் இஸட் ஜபருல்லாஹ்வின் வைர வரிகள் நம்மை சிந்திக்க வைக்கின்றன. மானுடத்தை இரத்தினச் சுருக்கமாக வருணிக்கும் இவர் பாணியே தனி.

மானுட மகத்துவம்

– கவிஞர் இஸட் ஜபருல்லாஹ்

மானுடம் என்பது மறைபொருள் அல்ல !
     மானுடம் என்பது ஜீவியக் கருப்பொருள் !
மானுடம் என்பது வேறிடம் இல்லை !
     மானுடம் என்பது மனிதனுக்குள்ளே !

மனிதனை மனிதன் உணர்வது மானுடம் !
     மனிதனுள் மனிதம் இணைவது மானுடம் !
மனுவின் நீதியை துறப்பது மானுடம் !
     மனிதன் புனிதனாய் சிறப்பது மானுடம் !

நிலைமை உணர்வது உதவுதல் மானுடம் !
     நித்தமும் கதவினைத் திறப்பது மானுடம் !
சளையாதுழைக்கும் சக்தியே மானுடம் !
     சத்திய வாழ்க்கைப் பத்தியம் மானுடம் !

மானுடம் என்பது அன்பில் பிறந்தது !
     மானுடம் என்பது செயலாய் நிற்பது !
மானுடம் என்பது அகத்துள் ஒளிர்வது !
     மானுடம் ஒன்றே மகத்துவம் மிக்கது !

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: