RSS

சுனாமி அலைகள்

26 Dec

jafarullah

[இன்று டிசம்பர் 26. சுனாமி நினைவு தினம். கவிஞர் இஜட். ஜபருல்லாஹ் சுனாமி தாக்கியபோது போது எழுதிய கவிதை இது]

கடலே..!

பாசத்தைக்கூட

உன்னோடுதானே சேர்ப்போம்..!

“பாசக்கடல்” என்று..!

இன்று ஏன் நீ

“மோசக்கடல்” ஆனாய்..?

 

கடலே..!

இறந்தவர்களை

நாங்கள் குளிப்பாட்டுவோம்..!

நீயோ –

மனிதர்களை குளிப்பாட்டி

இறக்கவைத்து விட்டாயே..!

அவர்களை அழுக வைத்து

எங்களை அழவைத்ததில்

அப்படியென்ன உனக்கு ஒரு மகிழ்ச்சி..?

 

கடலே..!

உன் வயிற்றுக்குள் வைத்து

எத்தனை ஜீவராசிகளை

உயிரோடு நீந்த வைக்கிறாய்..?

இவர்களை மட்டும்

ஏன் மிதக்க வைத்தாய்..?

 

கடலே..!

நீராடும் இளைஞர்களை

தாலாட்டும் தொட்டிலாய் –உன்

வெள்ளை நுரை சிரிப்போடு

தூக்கி இறக்குமே..

உன் அலைக்கரங்கள்..?

அது எப்படி இன்று

கொலைக்கரங்கள் ஆயின..?

 

கடலே..!

எங்கள்

உள்ளங் கால்களில்

ஒரு சிலிர்ப்பைக் கொடுத்து

வருடி சுத்தப்படுத்திய

உன் அலைக்கரங்கள்

இன்று

பூமித்தாயின் உடலை

அசுத்தமாக்கி விட்டதே எப்படி..?

 

அலையே..!

உன் பேரால்தானே

அலைபாடும் ஊர் என

“தரங்கம் பாடி” எனச்

சொல்லி மகிழ்ந்தோம்..!

நீ சுருதி மாறி

தரம் கெட்டு போனது ஏன்..?

வரம்பு மீறலா..? இல்லை

கடலின் கட்டளையா..?

 

*********************************************

 

இறைவா..!

பூமியை நிலைப்படுத்த

மலைகளை

ஆணிகளாய் அமைத்தவனே..!

 

அதனை

அடிக்கடி நாங்கள்

வெடிவைத்துத் தகர்த்ததினால்

பூமி அச்சு மாறி

பூகம்பம் வந்ததோ..?

 

அதன் உறுதி குலைந்ததால்

எங்கள் வாழ்க்கை

இறுதியாய் போனதோ..?

 

இறைவா..!

கடலைத் திடலாக்கி

திடலைக் கடலாக்கும்

காரியக்காரனே..!

 

அடிமைகள் நாங்கள்

கடலைத் தூர்த்து

கட்டிடங்கள் கட்டியது

தவறுதான்..

அதற்காகவா நீ

திடலை கடலாக்கினாய்?

 

இறைவா..!

மழையாய்ப் பொழியும்

குடிநீருக்குச் சொந்தக்காரனே..!

உன் சொல்லை மீறி

அதைக் காசுக்கு விற்ற

கயவர்கள் நாங்கள்..!

இன்று –

உப்புத்தண்ணீரில் – உறவின்

உயிர்களைத் தொலைத்தோம்..!

 

கரிக்கும் நீர் –

நெஞ்சை எரிக்கும் நீரான கொடுமை..!

என்ன செய்வது..?

பட்டபின்புதானே வருகிறது

பாழும் அறிவு..?

 

இறைவா..!

காலத்தின் அதிபதியே..!

நாங்கள் கூட

வசந்தகாலம்; கோடைகாலம்;

பனிக்காலம்; வேனில் காலம் !

ஏன் இலையுதிர் காலத்தைக்கூட

இயன்றவரை –

கணித்து வைத்தோம்..!

இருந்தும் என்ன செய்ய..!

கடல் பொங்கிய காலத்தை – எங்களால்

கணிக்க முடியவில்லையே…!

 

******************************************

Advertisements
 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: