காற்றின் முகவரி

பாலைவன
அஞ்சல் அட்டையில்
காற்றின் முகவரி
எத்துணை அழகு?

இந்த அடுக்குத் தொடர் .. ..
அண்ணாவின்
அடுக்கு மொழியைக் காட்டிலும்
அழகோ அழகு !

அகன்ற மணற்பரப்பை
ஆட்டோகிராப்
ஆக்கியது யார்?

மருந்துச்சீட்டில் 
அவசரமாய் கிறுக்கும்
மருத்துவரின் கையெழுத்து போலல்லாது

உலகிலேயே
அழகான கையெழுத்து
காற்றுக்குத்தான் போலும்.

தூரிகையே இல்லாமல்
ஓவியம் வரையும் சூத்திரம்
காற்றுக்கு மாத்திரமே சாத்தியம்.

நெளிவு சுளிவு
தெரிந்த காற்று
பிழைத்துக் கொள்ளும் !
அரசியல்வாதியின்
பிள்ளையைப்போல !

ஓவியர் ஜெயராஜின்
வளைவுகள் ஆபத்தானவைதான் !

இதோ பாருங்கள்
கவர்ச்சியான வளைவுகளை !
ஆனால் ஆபத்தானவை அல்ல

காற்றுக்கு 
கவிதை எழுத 
கற்றுக் கொடுத்தது
யாராக இருக்கும்?

படிமங்களும்
அடுக்குத் தொடர்களும்
தண்டியலங்காரமும்
அப்பப்பா…
அட்டகாசம் போங்க….

#அப்துல்கையூம்
11.11.2009